Rusiyanın futbol üzrə yığma komandası tarixində ilk dəfə olaraq Avropa Çempionatının yarımfinal mərhələsinə çıxıb. Onlar dörddə bir finalda turnirin favoritlərindən biri sayılan Hollandiya yığması üzərində 3-1 hesabı ilə fantastik qələbə qazanıb. Oyunun əsas vaxtı 1-1 hesabı ilə başa çatdığı halda, şimal qonşumuzun millisi ikinci ekstra-taymda iki dəfə fərqlənərək Hollandiyanı yarışlardan kənarlaşdırıb. Bütün gecəni paytaxt Moskva və Rusiyanın digər şəhərlərində qələbəlik olub. Qeyd edək ki, Rusiyanın yarımfinalda rəqibi bu gün keçriləcək İspaniya-İtaliya qarşılaşmasının qalibi olacaq. Digər yarımfinal oyununda isə Türkiyə millisi Almaniya ilə üz-üzə gələcək. Yarımfinal oyunları iyunun 25 və 26-da, final görüş iyunun 29-da keçiriləcək.